مهذبون معاً نرتقي
مقالات مشابهة
أبواب
أبواب – كتبت : منى عبد العزيز
احكيلنا حكايتك مع الابواب ؟؟؟ جربت قبل كده تحاول تفتح باب مقفول وفى الاخر تكتشف ان الجزء التانى من الباب هو الى بيتفتح ؟؟؟
… مواقف كتيرة طريفة فى أغلبها الى يحاول يدخل مكان والبابين قدامه وهو بيزق الباب الغلط .. أو بيزقه فى الاتجاه المعاكس … أذكر انى قريت لافتة على أحد الاماكن مكتوب فيها ( أقسم بالله الباب بيفتح فى الاتجاه لجوه مش لبرة ) …. كان واضح بالنسبة لى ان صاحب المكان تعب من محاولاته الكتير فى انه يوضح للناس اتجاه فتح الباب ويبدو انهم كانوا مصرين على فتحه بالخطأ فى الاتجاه المعاكس!
جربت قبل كده تقف قدام باب مقفول وتفضل تعافر وتعافر وتحاول تفتحه ؟؟؟ وبعد طول معافرة تكتشف ان المكان له باب تانى وان الوصول ليه مش مستحيل أبدا ……
جربت قبل كده تكسر المفتاح فى الباب من كتر محاولاتك فى فتحه وبعدها تكتشف انك كنت بتفتحه فى الاتجاه الغلط فكسرت المفتاح واتحبست للابد فى الناحية المقفولة ؟
هل حاولت تدخل بعشم فى باب قزاز وانت فاكر انه حيفتح معاك وفجاة تكتشف الحقيقة وانت بتصطدم بيه الاصطدام المتين وهو صامد قدامك لالالالا ينفتح
فى حياتنا كلنا أبواب محتلفة … الحياة بالفعل فى الحقيقة هى مجموعة من الأبواب بنحاول نفتحها ونتعامل معاها طول الوقت وكتير وقفنا قدام الباب الغلط بنحاول نفتحه والمشكلة الى عندنا متتحلش من هنا ولا تتحل بالشكل ده لكننا مصرين نرسم طريق وطريقة للأحداث بنحدد بيه الحلول وراضينن بتضييق عقولنا وقلوبنا بشكل غريب
حاولت تغير طريقة تفكيرك ؟؟ وتقول انا مش أعظم حد بيفكر وممكن يكون فيه أبواب تانية أنا مش ملتفت ليها ؟؟ جربت تسأل الى حواليك أو تسمعلهم يمكن الحلول جاية من عندهم مش من عندك وما خاب أبداا من استشار …
حاولت تقرى حقيقة الى حواليك فعلا بدل ما تنخدع وترتطم بالحقيقة زى الباب القزاز اياه الى بنخبط فيه واحنا متخيلين انه حيفتح وبسهولة ؟؟؟ فكرت تتصرف صح وتحاول تحل مشكلاتك فى اتجاهها الصح بدل ما تحاول تدفعها للاتجاه الغلط زى الباب الى صاحبه كاتب عليه اقسم بالله مش ده الاتجاه …
ساعات الى حوالينا بيحاولوا يلفتوا نظرنا لافضل الطرق للتعامل معاهم … لأفضل العبارات وافضل الممارسات الى تفتح ابواب قلوبهم وعقولهم … وكأنها لافتات متعلقة على أبوابهم بترشدنا للطريقة المثلى للتعايش معاهم .. لكننا أحيانا وبصلف وكبرياء أو جهل او عناد بنرفض وباصرار اننا نقرى الرسايل دى … بنصر على وضع روشتة وسيناريو للتعامل خاص بينا احنا وبس والنتيجة فشل … فشل ذريع فى العلاقات وفى الحياة عموما … بينما لو اتبعنا التعليمات دى وفكينا شفرات الابواب دى حندخل وبسهولة لقلوب وعقول من نريد …
الباب المقفول فى وشك وباصرار مش محتاج عناد لكنه محتاج ابتعاد واعادة تقييم فى الموقف كله ؟؟ يمكن ربنا قفله فى وشك لانه مش ده الباب ومش ده الطريق ولا دى الطريقة … يمكن الباب اتقفل لانه أغفلت أبواب تانية كان مفروض تلجألها وأولها باب ربك … أيوه … ساعات بتغفل وتقعد تطرق كل الابواب الا باب رب الأسباب ورب الأبواب
فى كل يوم جديد ربنا بيفتح لنا باب للرزق أو العلم أو الحب أو الحياة عموما ….
اقرى الرسالة المكتوبة على كل باب بعناية… متقفلش باب ربنا فتحهولك ولو لقيت باب مقفول باصرار عافر وافهم سبب قفل الباب
كل يوم بتتقفل فيه أبواب … وبتتفتح غيرها … اقرى رسايل ربنا كويس وحاول توصل لحكمة الابواب دى … امشى مع الابواب الى ربنا بيفتحهالك تفلح وترتاح …. وعاند وزق فى أبواب ربنا مأذنش بفتحها تشقى وللأبد
لسماع المقال صوتيا
أبواب .. لمتابعة المزيد من الموضوعات يمكنكم متابعة صفحتنا على الفيسبوك مهذبون
