مهذبون معاً نرتقي
مقالات مشابهة
بسم الله الهادي السلام
نبدأ
الكُرْبَــــــــــــــــــــــــــــــــــــــــــــاج
” – أنت غبي !
– ما الي ذيك عمره ما هيفلح !
– ايه دا أنا معرفتكيش !!
أنتي تخنتي أوي بعد الولادة
– مهو أنتوا متربتوش وخسارة فيكم اللقمة !
– لو راجل ابقى اعملها تاني !
– “افضلي ارفضي كده شكلك هتعنسي جنب أمك ”
– أنا لو عندي بنت مش هجوزها لواحد زيك !
– انت هتعمل فيها دور القلب الكبير الحنين الي يهمك مصلحتي !!
– انتي محتاجة تروحي لدكتور نفسي يا معقدة !
—————————————————–
” – أنت غبي !
قالها مدرس جهبز محب للرياضيات لطالب علي قد حالاته بس بيجتهد مش مُقصِّر
النتيجة مع تكرار الموقف وصوت المدرس العالي وانفعال المدرس علي الطالب
الطالب راح لأهله يعيط منهار أنا مش مكمل مع باللفظ كده
المدرس دا بيهدني ومبفهمش منه حاجة
وللأسف أهله موفقوش يغيروا المدرس !
المدرس بيقول عن الطالب دا من أحسن الطلاب عندي بس بشد عليه عشان يبقي أحسن !
—————————————————
– ما الي ذيك عمره ما هيفلح !
أم قالتها لابنها عشان بيفكر يفتح مشروع بعيد عن مجال دراسته بعد سبع سنين من عمره في طب بلا أي شغف
الإبن بيقول أنا عارف أمي بتحبني وعاوزاني أمشي في المضمون
بس هيا متعرفش ان من كتر كلامها ليا حاسس اني فعلا هفشل
مش قادرة تصدق إن كلمتها بترفعني سابع سما أو تنزلني سابع أرض
متعرفش ان لو كل الناس قالولي هتفشل وهيا قالتلي هتنجح هنحت في الصخر عشان بس مشفش عنيها مكسورة بسببي
الأم بتقول هو مش عارف مصلحته فين ولازم أفوقه قبل فوات الأوان ومش هيفوق الا كده
——————————————————-
– لو راجل ابقى اعملها تاني !
قالها أب لابنه المراهق بعد ما عمل غلطة كبيرة واعتذرله عليها
وقالها قدام العائلة و أخواته الأصغر والأكبر !
الولد بيعلّق
اه انا غلطت بس مش من حقه يصغرني قدام اخواتي !!
—————————————————
– أنا لو عندي بنت مش هجوزها لواحد زيك !
الجملة دي قالتها أم لإبنها في خناقة عابرة
الأم ست محترمة جدا ووقورة جدا
والابن خلوق و في محاولة دائمة لبرها
الأم مش فاكرة أصلا إنها قالتها
بس الكلمة دي علي حد قوله مش قادر أنساها !
—————————————————–
– انتي محتاجة تروحي لدكتور نفسي يا معقدة !
قالها خطيب لخطيبته عادي جدا وهما بيتخنقوا
ومستغرب فركشت ليه !!
—————————————————–
أنا بقول كفاية كده
كفاية مواقف توجع القلب
كفاية لسان كلامه نازل علي القلب ذي الكرباج
بيخلي الواحد يتعصر من القهر النفسي
والعين يفيض بيها الحال
لعلها تروّح شوية عن النفس بحبة دموع
أنتوا عارفين المشكلة الحقيقية ايه في كل المواقف دي
الي منها مواقف حصلت بالفعل
لو ركزنا هنلاقي أغلب المواقف لناس بتحب بعضها علي فكرة
مش بقلك أعداء وبيهدّوا بعض نفسيا
آه دا واقع بنقابل نفوس مريضة كثير عاوزة تحس بقيمة نفسها بإنها تنتقص من ال قدمها
لأ دول أهل وحبايب ويتكلموا من منطلق خوفهم
علي مصلحة بعض
هيا غالبا نصيحة بس متغلفة بغلاف قسوة
ظنا من الناصح إنها كده هتعمل مفعولها !
و الحب عمره ما يجتمع مع قلة الإحترام لأي سبب كان
دي الفطرة السليمة الي بتقول كده
دا نوع من الكرباج
في نوع تاني بيتغلف بتوب العفوية وتسلية الوقت
اصل بيني وبينك هيا طعمها لذيذ
لما تبين إن الي قدامك مش بيفهم
و أنا الي فاهم في صحيح الدين و الديكور و اللبس والإتيكيت
واهو بردو نضحك ونتبسط
وبننسى أو بتناسى أو بنجهل أحياناً قول الستير
(يَا أَيُّهَا الَّذِينَ آمَنُوا لَا يَسْخَرْ قَوْمٌ مِّن قَوْمٍ عَسَىٰ أَن يَكُونُوا خَيْرًا مِّنْهُمْ) سورة الحجرات
ثم قوله
(وَلَا تَلْمِزُوا أَنفُسَكُمْ)
(في التفسير ولا تعيبوا أنفس أخواتكم فهي بمنزلة أنفسكم)
ولم يقل !!
(ولا تلمزوا أخواتكم)
مهو الي يقلل من قيمة غيره عشان يضحك يبقي بيقلل من قيمة نفسه
وكسفة دم الشخص التاني الي وصلِّتُه انه مش عارف يرد إهانته مش بالساهل عند ربنا
حتي في عالم الفيس بوك لما نمسك شخصية مشهورة ننظّر علي خطأ وقع فيه ذي ما كلنا بنقع في أخطاء
أو صورة أو فيديو لشخص غير معروف
بس لابس لبس غريب عن مجتمعنا
أو بيعرض ثقافته بحرية
ولو حد قال دعوا الخلق للخالق
نقول بنعبر عن رأينا
يعني احنا لينا حرية التعبير
و هو ملوش حرية الفعل !!
دا علي أساس اننا ضامنين اننا مش هنقع في فتنة الشخص المشهور دا مثلا !
أو الشخص المغمور
عادي مهو هو الي جابه لنفسه حد يشير صور بالشكل دا ومش عاوز الناس تعلق!!
في حين اننا منقبلش حد غريب أو حتي قريب يعلق علي لبسنا بنفس الأسلوب الي استخدمناه من شوية مع الشخص المغمور !!
عــــــــــــــــــــــالم من التناقض الفكري !!
تعالوا نرجع مع بعض للأصل
مَّا يَلْفِظُ مِن قَوْلٍ إِلَّا لَدَيْهِ رَقِيبٌ عَتِيدٌ) سورة ق (
أىّ قول
أي رأى في شخص الشخص المشهور أو المغمور
أى نكتة
علي الفيس بوك أو علي أرض الواقع
كل دا في ملك الحسنات أو السيئات بيكتبه
تخيل !
الرسول الكريم صل الله عليه وسلم قال
(ومن كانَ يؤمنُ باللَّهِ واليومِ الآخرِ فليقُلْ خيراً أو ليصمُتْ)
مفيش اختيار ثالث
يا كلمة فيها خير وتأدي لخير يا نمسك علينا ألسنتنا
خصوصا في زمن الفتن
“امسك عليك لسانك
وليسعك بيتك
وابك علي خطيئتك”
صدقت يا رسول الله صل الله عليه وسلم
الأذي النفسي الي بنتعرضله نتيجة كلمة اتقالت من لسان ذي الكرباج قالها بدون لا مبالاة بمشاعر الآخر ممكن تهد نفوس وبيوت وعلاقات
ساعات بننسي
“كما تدين تدان”
هو لو حد قالي نفس الكلمة انا لسة قايلاها حالا هقدر استحملها !!
ولكن
خلينا واقعيين
كلنا بنغلط في حق بعض
وفي لحظة الغضب ممكن يصدر منا تصرفات
وأحيانا كلمات نرجع نندم عليها
بس في أوقات كلام حتي بعد ما نتصافي بيفضل
محفور في ذاكرة القلب مبيتنسيش
…..
مربط الفرس في ايه؟!
إنما الحلم بالتحلم
واحدة واحدة
لو حاولنا نعوّد لسانا علي الكلام الطيب وقت عدم الغضب وقت الجد وقت الهزار
بنسبة كبيرة لساني وقت الغضب غلطه هيقل بالتدريج
لكن لو الألفاظ الخارجة الي بقت كووول دلوقتي
والألفاظ القاسية الجارحة
بقت أسلوب حياة
هيا العادي وقت الهزار والتعبير عنا في الجد
يبقي ازاي هنتعامل بالكلمة التي تبني متهدش وقت الخلاف أو الغضب !
في تمرين علي الكلمة الطيبة
كلمة ذي شكرا و آسف
الكلمات الي كادت تنقرض من بيوتنا!!
أصل كل ما الألفة بتزيد الكلفة بتتشال
ببطل أَتجمّل قدامك
بس علم النفس بيقول إن دا من أكثر الأسباب الي بتأدي للمشاكل الأسرية
فكرة إن الشخص الي قدامي مضمون
زعلته مزعلتهاش هيفضل أبويا وهتفضل أختي
وبكرة أصالحه بكلمتين
أو حتي مصلحوش والوقت هيدوّب الزعل
مش كل المواقف ومش كل الكلمات بتدوب مع الزمن
لما حدود الإحترام المتبادل في أي علاقة بتتكسر تحت أي مسمي
وتهووون حاجات حلوة بينا كانت بتنمي العلاقات بينا ذي شكرا وآسف
بيحل الجفا محل الود من غير ما نحس
واحدة واحدة
شكرا وآسف
الكلمتين دول ممكن يبنوا أو يهدّوا الود بين القلوب لو استُخدموا صح
الأب يفضل أب ليه احترامه حتي لو قرر يبقي صديق لأولاده
والأم تفضل أم فوق الراس حتي لما لعبت دور الصديقة في حياة أولادها
والزوجة هتفضل الحبيبة الي محتاجة تسمع كلام طيب حتي لو بقت أم ل عشر عيال
وجوزك هيفضل راجلك الي مستني يشوف لمعة عينكي في كلامك عنه حتي لو بقي بكرش
والأخت هتفضل محتاجة لسند أخوها وحنيته حتي لو كانت بنت بميت راجل
في حاجات كده مينفعش تستبدل بحاجات تانية في القلب
ذي الكلمة الحلوة ميغنيش عنها هدية حلوة
ممكن مرة تغني
بس لا يمكن تحل محلها
إذا كان خير البشر قال الله له عز وجل
(وَلَوْ كُنتَ فَظًّا غَلِيظَ الْقَلْبِ لَانفَضُّوا مِنْ حَوْلِكَ) سورة آل عمران
وهو من هو من كمال الخلق القويم صل الله عليه وسلم
و مع ذلك الفظاظة في الكلام كانت ستفض من حوله!
فما بالك بينا احنا المُخطئين يالي بنتعكز علي نقص بعض
وأخيرا متيأسش
لو في حد في حياتك لسانه كرباج
ادعيله ربنا يهديه للكلم الطيب
ولنفسك بالثبات علي كل طيب
(ادْفَعْ بِالَّتِي هِيَ أَحْسَنُ)
لعلك تكون سبب في لين قلبه و لسانه
(فَإِذَا الَّذِي بَيْنَكَ وَبَيْنَهُ عَدَاوَةٌ كَأَنَّهُ وَلِيٌّ حَمِيمٌ)سورة فصلت
ما بالك بالمقربين الأحباب!!
دمتم طيبين متفائلين
